தி பாரடைஸ் – திரை விமர்சனம் !

அடக்குமுறையில் சிக்கித் தவிக்கும் சவாரி இன மக்கள், தங்களுக்கான அடையாளத்தையும் சுதந்திரத்தையும் பெற போராடுகிறார்கள். அந்த போராட்டத்தின் மையமாக இருக்கும் ஜடால் (நானி), தனது தாயைப் போலவே அடக்குமுறைக்கு எதிராக குரல் கொடுத்து, தனது மக்களை அடிமைத்தனத்தில் இருந்து மீட்க முயற்சிக்கிறார். அவரது போராட்டம் வெற்றி பெற்றதா என்பதே ‘தி பாரடைஸ்’ படத்தின் கதை.

ஜடால் கதாபாத்திரத்தில் நடித்திருக்கும் நானி, ஆக்ரோஷமான நடிப்பால் கவனம் ஈர்க்கிறார். குறிப்பாக உணர்ச்சிகரமான காட்சிகளில் சிறப்பாக நடித்துள்ளார். நாயகியாக வரும் கயாடு லோஹருக்கு அதிக காட்சிகள் இல்லாவிட்டாலும், அவரது கதாபாத்திரம் அழுத்தமாக அமைக்கப்பட்டுள்ளது. வில்லனாக வரும் மோகன் பாபு, இளமை மற்றும் வயதான தோற்றம் என இரு விதமான கதாபாத்திரங்களிலும் கம்பீரமான நடிப்பை வெளிப்படுத்துகிறார்.

சோனாலி குல்கர்னி, சம்பூர்னேஷ் பாபு, தணிகலபரணி, ஈஸ்வரி ராவ் உள்ளிட்ட மற்ற நடிகர்களும் தங்களது கதாபாத்திரங்களுக்கு ஏற்ற நடிப்பை வழங்கியுள்ளனர்.

ஒளிப்பதிவாளர் சி.எச்.சாய், அழுக்கு மற்றும் சகதி நிறைந்த ‘பாரடைஸ்’ உலகத்தையும், அங்கு வாழும் மக்களின் வாழ்க்கையையும் பிரமாண்டமாக காட்சிப்படுத்தியுள்ளார். அனிருத்தின் பின்னணி இசை ஆக்‌ஷன் காட்சிகளுக்கும், கதாபாத்திரங்களின் உணர்வுகளுக்கும் வலு சேர்க்கிறது.

ஸ்ரீகாந்த் ஓடெலாவின் இயக்கத்தில் அடக்குமுறைக்கு எதிரான போராட்டம் அழுத்தமாக சொல்லப்பட்டிருந்தாலும், திரைக்கதை பெரும்பாலும் சண்டைக் காட்சிகளை மட்டுமே நம்பி பயணிப்பது பலவீனமாக உள்ளது. படம் முழுவதும் இடம்பெறும் அதிகப்படியான வன்முறை மற்றும் ரத்தம் தெறிக்கும் காட்சிகள் ஒரு கட்டத்தில் பார்வையாளர்களுக்கு சோர்வை ஏற்படுத்துகின்றன. நீளமான படமாக இருப்பதும் படத்தின் வேகத்தை பாதிக்கிறது.

மொத்தத்தில், நானியின் நடிப்பு, பிரமாண்டமான காட்சியமைப்பு, ஒளிப்பதிவு மற்றும் இசை படத்திற்கு பலம் சேர்க்கின்றன. ஆனால், அதிகப்படியான வன்முறை மற்றும் நீளமான திரைக்கதை காரணமாக ‘தி பாரடைஸ்’ முழுமையான திருப்தியை தரத் தவறுகிறது.

 Rating : 3 / 5