99/66 திரை விமர்சனம் ! Review

ஒரு அடுக்குமாடி குடியிருப்பை மையமாகக் கொண்டு திகில் மற்றும் திருப்பங்களுடன் சொல்லப்பட்டிருக்கும் படம் தான் ‘99/66’. ரச்சிதா மகாலட்சுமி – சபரி தம்பதிகள் 66 எண் வீட்டை வாங்கி குடியேறுகிறார்கள். அதே குடியிருப்பின் 99 ஆம் எண் வீட்டில் வசிக்கும் ஸ்வேதாவுடன் ரச்சிதாவுக்கு நட்பு உருவாகிறது. இதற்கிடையே இரவு நேரங்களில் வெளியே செல்ல முயற்சிக்கும் சங்கத் தலைவர் மூர்த்தி மற்றும் அவரை தடுத்து நிறுத்தும் மர்மமான சம்பவங்கள் போன்றவை கதையில் சஸ்பென்ஸை உருவாக்குகின்றன.

பணத்திற்காக தனது மனைவி ரச்சிதாவை கொலை செய்ய சபரி திட்டமிடுவது, அதிலிருந்து அவர் தப்பித்துக் கொண்டே இருப்பது போன்ற சம்பவங்கள் கதையை திகில் நிறைந்த பாதைக்கு அழைத்துச் செல்கின்றன. ஒருநாள் இரவில் ஸ்வேதாவை அவரது கணவர் கொலை செய்வதை ரச்சிதா பார்க்கிறார். ஆனால் குடியிருப்புவாசிகள் உதவியுடன் காப்பாற்ற முயன்றபோது, ஸ்வேதா ஏற்கனவே இறந்துவிட்டார் என்பதும், 99 ஆம் எண் வீட்டில் யாரும் வசிக்கவில்லை என்பதும் தெரிய வருகிறது. அப்படியானால் ரச்சிதாவுக்கு மட்டும் தோன்றும் ஸ்வேதா யார்? அவர் ஏன் ரச்சிதாவை சந்திக்கிறார்? என்ற மர்மங்களே படத்தின் சுவாரஸ்யமான மையம்.

கதையின் நாயகியாக நடித்திருக்கும் ரச்சிதா மகாலட்சுமி, ஆவி புகுந்தபின் காட்டும் ஆக்ரோஷமும், கணவரிடம் வெளிப்படுத்தும் உணர்ச்சிகளும் மூலம் தனது கதாபாத்திரத்திற்கு நியாயம் செய்கிறார். ஆனால் அவரிடம் ரசிகர்கள் எதிர்பார்த்த சில அம்சங்கள் குறைவாக இருப்பது சிறிய ஏமாற்றமாக இருக்கிறது. மற்றொரு முக்கிய கதாபாத்திரத்தில் வரும் ஸ்வேதா, அனைத்து உயிர்களிடமும் அன்பு செலுத்தும் நல்ல மனப்பான்மையுடன் அமைந்துள்ள தனது பாத்திரத்தை அமைதியான நடிப்பால் வெளிப்படுத்துகிறார்.

நாயகர்களாக நடித்துள்ள சபரி மற்றும் ரோகிந்த் புதுமுகங்கள் என்றாலும், நல்லவர்களாக நடித்து பின்னால் வில்லத்தனம் காட்டும் அவர்களது நடிப்பு கதைக்கு வலு சேர்க்கிறது. சாம்ஸ், முல்லை, கோதண்டம், சிங்கம்புலி ஆகியோரின் காமெடி பெரிதாக தாக்கம் ஏற்படுத்தவில்லை. பவன் கிருஷ்ணா, கே.ஆர்.விஜயா, பி.எல்.தேனப்பன் உள்ளிட்டவர்களின் கதாபாத்திரங்கள் திரைக்கதைக்கு ஆதரவாக இருக்கின்றன.

ஒளிப்பதிவாளர் சேவிலோ ராஜா, முழு படத்தையும் ஒரே அடுக்குமாடி குடியிருப்பில் படமாக்கியிருந்தாலும், பல்வேறு கோணங்களில் அதை புதிதாக காட்டி காட்சிகளை சலிப்பில்லாமல் வைத்திருக்கிறார். மீனாட்சி சுந்தரத்தின் எடிட்டிங் மற்றும் ஜெயமுருகனின் கலை இயக்கமும் படத்திற்கு ஆதரவாக இருக்கின்றன.

கதை, திரைக்கதை, வசனம், இசை, இயக்கம், தயாரிப்பு என பல பொறுப்புகளை ஏற்றுள்ள எம்.எஸ்.மூர்த்தி, வழக்கமான திகில் பட பாணியில் கதையை சொல்லியிருந்தாலும், அதில் திருப்பங்களையும் சமூக கருத்துகளையும் இணைத்து சுவாரஸ்யமாக நகர்த்தியிருக்கிறார். குறிப்பாக பெண்களுக்கு எதிரான குற்றங்களுக்கு தண்டனை அவசியம் என்பதையும், மனிதர்கள் எல்லா உயிர்களிடமும் அன்பு காட்ட வேண்டும் என்பதையும் படத்தில் பதிவு செய்துள்ளார்.

மொத்தத்தில், சில குறைகள் இருந்தாலும் திருப்பங்களும் திகில் அம்சங்களும் மூலம் பார்வையாளர்களை ஈர்க்கும் முயற்சியாக ‘99/66’ அமைகிறது.

Rating : 3 / 5