காக்கி சர்க்கஸ் விமர்சனம் ‌! Review

சிறைச்சாலையில் கைதிகளை திருத்துவது தான் முக்கிய பணி என்று நம்பும் துணைச் சிறைச்சாலை கண்காணிப்பாளர் முனீஷ்காந்த், கைதிகளுக்காக சிறிய நூலகம் அமைத்து, புத்தகம் படிக்கும் பழக்கத்தை ஊக்குவிக்கிறார். அவருடன் காவலராக பணியாற்றும் சுபாஷ் செல்வம்.

இந்த நிலையில், சிறைச்சாலை கோவில் உண்டியலில் இருந்த பணம் திருடப்படுகிறது. இந்த சம்பவம் வெளியில் தெரியாமல் இருக்க வேண்டும் என்பதால், காவலர் சுபாஷ் செல்வம் கடன் வாங்கி அந்த பணத்தை திருப்பி வைக்க முடிவு செய்கிறார். ஆனால், அவர் கடன் வாங்கி வீட்டில் வைத்த பணமும் மீண்டும் திருடப்படுகிறது.

இதனால் கடும் சிக்கலில் சிக்கிய சுபாஷ் செல்வம், திருடன் யார் என்பதை அறிந்தாலும் அவரை உடனடியாக பிடிக்க முடியாத நிலை உருவாகிறது. அதன்பின், ஆதாரங்களுடன் திருடனை பிடிக்க அவர் எடுக்கும் முயற்சிகளே தொடரின் மையக் கதை.

இயக்குநர் அமீன் பாரிப், சிறைச்சாலை மற்றும் கோவில் உண்டியலை மையமாக வைத்து சுவாரஸ்யமான கதையை உருவாக்கியுள்ளார். நகைச்சுவை மற்றும் த்ரில்லர் அம்சங்களை இணைத்து, ஒவ்வொரு அத்தியாயத்தையும் விறுவிறுப்பாக நகர்த்தியுள்ளார்.

முனீஷ்காந்த், வழக்கமான நகைச்சுவை பாணியை விட்டு விலகி, அமைதியான மற்றும் பொறுப்பான கதாபாத்திரமாக நடித்திருப்பது சிறப்பாக அமைகிறது. சுபாஷ் செல்வம், காமெடியுடன் சேர்த்து ஆக்ஷன் காட்சிகளிலும் திறமையை வெளிப்படுத்தியுள்ளார்.

திருடன் கதாபாத்திரத்தில் ராஜேஷ் மாதவன், சாதாரண மனிதராக தோன்றினாலும், வித்தியாசமான நோக்கத்துடன் திருடுவது கதைக்கு புதுமை சேர்க்கிறது.

துணை நடிகர்கள் அனைவரும் தங்களது கதாபாத்திரங்களுக்கு பொருத்தமாக நடித்துள்ளனர். ஒளிப்பதிவு, இசை, எடிட்டிங் ஆகிய தொழில்நுட்ப அம்சங்களும் தொடரின் தரத்தை உயர்த்துகின்றன.

மொத்தத்தில், ‘காக்கி சர்க்கஸ்’ நகைச்சுவை, த்ரில்லர், சிந்தனை ஆகியவற்றை கலந்து, சுவாரஸ்யமாக நகரும் ஒரு நல்ல தொடராக அமைந்துள்ளது.

Rating : 3 / 5