ராமாயணம் திரை விமர்சனம் !

வால்மீகி எழுதிய ராமாயண இதிகாசத்தை மையமாகக் கொண்டு பிரமாண்ட பொருட்செலவில் உருவாகியுள்ள திரைப்படம் ‘ராமாயணம்’. நிதேஷ் திவாரி இயக்கத்தில் ரன்பீர் கபூர், சாய் பல்லவி, ரகுல் ப்ரீத் சிங் ,யஷ் ஆகியோர் முக்கிய கதாபாத்திரங்களில் நடித்துள்ளனர்.

ராமனின் பிறப்பு, சீதையின் திருமணம், வனவாசம், ராவணனின் வருகை என இதிகாசத்தின் முக்கிய நிகழ்வுகளை பிரமாண்டமான காட்சிகளுடன் திரையில் கொண்டு வந்திருக்கிறார்கள். ராமனாக ரன்பீர் கபூர் அமைதியும் கம்பீரமும் கலந்த நடிப்பை வெளிப்படுத்துகிறார். சீதையாக சாய் பல்லவி தனது இயல்பான நடிப்பால் கவனம் ஈர்க்கிறார். ரகுல் ப்ரீத் சிங்  சூர்ப்பணகை கதாபாத்திரத்திற்கு கச்சிதமாக அமைந்துள்ளார். குறிப்பாக, ராவணனாக வரும் யஷ் தனது மிரட்டலான தோற்றம், உடல்மொழி, நடிப்பு ஆகியவற்றால் படத்திற்கு மிகப்பெரிய பலமாக இருக்கிறார்.

படத்தின் பிரமாண்டமான அரங்குகள், ஆடை வடிவமைப்பு, ஒளிப்பதிவு, கிராபிக்ஸ் காட்சிகள் ஆகியவை பாராட்டும்படி அமைந்துள்ளன. ஏ.ஆர்.ரஹ்மான் மற்றும் ஹான்ஸ் ஜிம்மர் இணைந்து அமைத்துள்ள பின்னணி இசை பல காட்சிகளுக்கு வலு சேர்க்கிறது. குறிப்பாக, ராவணன் தொடர்பான காட்சிகளும், ஜடாயு சண்டைக்காட்சியும் பிரமிக்க வைக்கின்றன.

அதேவேளையில், ஏற்கனவே அனைவருக்கும் தெரிந்த கதை என்பதால் சில காட்சிகள் எதிர்பார்த்தபடியே நகர்கின்றன. தொடக்கத்தில் திரைக்கதை மெதுவாகச் செல்வதும், நீண்ட நேரப் படமாக இருப்பதும் சிறிய சலிப்பை ஏற்படுத்துகின்றன. சில கிராபிக்ஸ் காட்சிகளிலும் செயற்கைத்தன்மை தெரிகிறது.

மொத்தத்தில், பழக்கப்பட்ட ராமாயணக் கதையை நவீன தொழில்நுட்பத்துடனும் பிரமாண்டமான திரை அனுபவத்துடனும் கொடுத்திருக்கிறார்கள். குறிப்பாக, யஷின் ராவணன் கதாபாத்திரம் படத்தின் முக்கிய பலம். குடும்பத்துடன் திரையரங்கில் பார்க்கக்கூடிய பிரமாண்டமான இதிகாசத் திரைப்படம்.

Rating : 3 / 5