எக்ஸாம் விமர்சனம் - சமூக உண்மைகளை உரைக்கும் விறுவிறுப்பான இணையத் தொடர் !

போலீஸ் டி.எஸ்.பி.யாக இருக்கும் அதிதி பாலன், தனது பணி மாறுதலுக்குப் பிறகு புதிய இடத்திற்கு பொறுப்பேற்க செல்லும் போது, துஷாரா விஜயனால் கடத்தப்பட்டு அடைத்து வைக்கப்படுகிறார். அதன் பின்னர் அதிதி பாலன் பெயரில் துஷாரா விஜயன் டி.எஸ்.பி.யாக பதவி ஏற்று, அங்கு நடைபெறவுள்ள அரசு தேர்வு மோசடியை கண்டுபிடிக்கும் முயற்சியில் இறங்குகிறார்.

ஆரம்பத்தில் அந்த மோசடி அதிதி பாலன் மூலம் நடைபெறுகிறது என்று நினைத்து செயல்படும் துஷாரா விஜயனுக்கு, பின்னர் இதற்குப் பின்னால் கண்ணுக்கு தெரியாத சக்தி ஒன்று இருப்பது தெரிய வருகிறது. அந்த மறைமுக நபர் காவல்துறை மற்றும் அரசு அதிகாரிகளை தனது கையில் வைத்து மோசடியை நடத்த திட்டமிடுகிறார்.

அந்த மர்ம நபர் யார்? மோசடியின் பின்னணி என்ன? துஷாரா விஜயன் அதை முறியடித்தாரா? என்பதற்கான பதிலை பரபரப்பாக வெளிப்படுத்தும் இணையத் தொடராக ‘எக்ஸாம்’ உருவாகியுள்ளது.

கதை மற்றும் இயக்கம் : 

நடுத்தர மக்களின் வாழ்க்கையை மாற்ற அரசு வேலைகள் முக்கியமானவை. ஆனால் பணமும் அதிகாரமும் உள்ளவர்கள், அவர்கள் உழைப்பை எவ்வாறு பறிக்கிறார்கள் என்பதை அரசு தேர்வு மோசடிகள் மூலம் இயக்குநர் சற்குணம் உணர்வுப்பூர்வமாக சித்தரித்துள்ளார்.

இணையத் தொடர்கள் என்றால் கிரைம், திகில் என்ற மரபை உடைத்து, சமூக பிரச்சினையை விறுவிறுப்பாக சொல்ல முடியும் என்பதை இந்த தொடரின் மூலம் நிரூபித்துள்ளார். பல உண்மை சம்பவங்களை தைரியமாக காட்சிப்படுத்தி, அரசு அமைப்பின் குறைகளை நுணுக்கமாக வெளிக்காட்டியுள்ளார்.

நடிப்பு : 

முக்கிய கதாபாத்திரங்களில் நடித்திருக்கும்

துஷாரா விஜயன் மற்றும் அதிதி பாலன் இருவரும் தங்கள் வேலையை சிறப்பாக செய்துள்ளனர்.

துஷாரா விஜயனின் அழுத்தமான நடிப்பு, அரசு வேலைக்காக போராடும் ஏழை மக்களின் வேதனையை பிரதிபலிக்கிறது.

அதிதி பாலன், பணமும் அதிகாரமும் இருந்தால் எதையும் சாதிக்கலாம் என்ற மனநிலையை துல்லியமாக வெளிப்படுத்தியுள்ளார்.

சப் இன்ஸ்பெக்டர் செழியன் வேடத்தில் நடித்திருக்கும்

துரை சுதாகர் தனது இயல்பான நடிப்பால் கவனம் ஈர்க்கிறார். ஆரம்பத்தில் எதிர்பார்ப்பு ஏற்படுத்தி, கிளைமாக்ஸில் வலுவான திருப்பத்தை வழங்கும் அவரது கதாபாத்திரம் சிறப்பு பெறுகிறது.

தொழில்நுட்ப அம்சங்கள் : 

இசை, ஒளிப்பதிவு, படத்தொகுப்பு அனைத்தும் நேர்த்தியாக அமைந்துள்ளன.

மலைப்பகுதிகளில் படமாக்கப்பட்ட காட்சிகள் கண்களுக்கு விருந்தாக இருக்கின்றன. பின்னணி இசை, காட்சிகளின் வேகத்தை விட உணர்வுகளுக்கு முக்கியத்துவம் அளிக்கிறது.

முதல் சில அத்தியாயங்கள் மிகவும் விறுவிறுப்பாக நகர்ந்தாலும், பின்னர் அந்த வேகம் குறைவது சிறு குறையாக உள்ளது. இருப்பினும், இதுவரை அதிகம் பேசப்படாத அரசு தேர்வு மோசடி என்ற முக்கிய பிரச்சினையை எந்த சமரசமும் இன்றி வெளிப்படுத்தியிருப்பது குறிப்பிடத்தக்கது.

சமூக உண்மையை சுவாரஸ்யமாக சொல்லியிருக்கும் ‘எக்ஸாம்’ – கண்டிப்பாக பார்க்க வேண்டிய இணையத் தொடர்.

Rating : 3.5 / 5